Пад назвай “Гэта цікава: па старонках дзіцячых часопісаў і газет” прайшоў дзень дзіцячай прэсы ў дзяржаўнай установе адукацыі "Сярэдняя школа №3", арганізаваны цэнтральнай бібліятэкай да Года навукі.

Асноўнай мэтай мерапрыемства стала прыцягненне ўвагі навучэнцаў школы да перыядычных выданняў, як да крыніцы аператыўнай інфармацыі, садзейнічанне пашырэнню ведаў і папулярызацыі перыядычных выданняў сярод дзяцей.

Што такое перыядычныя выданні, для чаго існуюць сродкі масавай інфармацыі і чым адрозніваюцца дзіцячыя перыядычныя выданні ад дарослых распавяла настаўніца Бадунова С.В.

Экскурс па старонках часопісаў  і газет “Увесь карагод часопісаў і газет”, які  правяла бібліятэкар школы Слука Н.Ф., пазнаёміў ўдзельнікаў з прадстаўленымі часопісамі і газетамі, цікавымі рубрыкамі, аб тым, што друкуецца на іх старонках, якому ўзросту яны адрасаваны.

Падарожжа па рубрыцы “Рэха гісторыі”, змешчанай на старонках часопіса “Рюкзачок” да 500-годдзя беларускага кнігадрукавання правяла бібліятэкар І катэгорыі аддзела па рабоце з дзецьмі цэнтральнай бібліятэкі Грыцэнка С.А. Пазнавальным стала знаёмства з Францыскам Скарынай – беларускім асветнікам, заснавальнікам друкаванай кнігі.

Карыснай інфармацыяй для дзяцей стаў аповед пра беларускага гісторыка Уладзіміра Ліхадзедава, які першы ў свеце з дапамогай тэхналогій ХVI стагоддзя ўзнавіў кнігу – Біблію Ф.Скарыны. Адбітак Бібліі рабілі на паперы, якая  выраблена чарпальным метадам. Удзельнікі мерапрыемства мелі магчымасць патрымаць гэту паперу і адбітак у сваіх руках.

Як “устроена” кніга? З чаго робяць паперу і навошта збіраць макулатуру? Як зрабіць закладку са звычайнай гумкі і шмат чаго цікавага даведаліся навучэнцы школы. Каля выставы – прапановы “Чытай, гартай, свет пазнавай” зацікаўленыя атрымалі памятку ад часопіса“Рюкзачок” - “Як атрымаць паперу ў хатніх умовах?”

Мерапрыемства адбылося цікавым і змястоўным.